Joriy yilning 15-iyun kuni poytaxtimizdagi muhtasham “Xalqlar doʻstligi” sanʼat saroyida Toshkent davlat tibbiyot universiteti (TDTU) tomonidan tashkil etilgan “Bitiruvchi-2026” tantanali bayram tadbiri boʻlib oʻtdi.
Tadbirda universitet rahbariyati, professor-oʻqituvchilar, soha faxriylari, bitiruvchilar hamda ularning ota-onalari ishtirok etishdi. Yillar davomida mashaqqatli ilm yoʻlini bosib oʻtib, bugun sharafli shifokorlik kasbining ilk ostonasida turgan yosh mutaxassislarni qutlash uchun yigʻilganlar bayramona kayfiyatda kutib olindi.
Tantanali kechada soʻzga chiqqanlar bitiruvchilarni mustaqil hayotga qadam qoʻyayotganliklari bilan tabriklab, kelgusi masʼuliyatli faoliyatlarida — xalqimiz salomatligini saqlashdek muqaddas ishda ularga ulkan zafarlar tilashdi.
Professor T.A. Bobomuratov: «Yangi avlod shifokorlari xalqimiz xizmatiga tayyor»
Tadbirning eng hayajonli va ahamiyatli qismlarida soha fidoiylarining fikrlari tinglandi. Xususan, tantanada ishtirok etgan 1-son bolalar kasalliklari propedevtikasi kafedrasi mudiri, tibbiyot fanlari doktori, professor Bobomuratov Turdiqul Akromovich mamlakatimiz yetakchi telekanallariga intervyu berdilar.
